பென்சில்வேனியாவில் நடந்த பிரசார கூட்டத்தில் டிரம்ப், பேசிக் கொண்டு இருந்த போது மர்ம நபர் திடீரென துப்பாக்கியால் சுட்டார். இதில் டிரம்ப் காதில் காயத்துடன் தப்பினார். மருத்துவமனையில் சிகிச்சைக்கு பிறகு, தனி விமானம் மூலம் நியூஜெர்சி வந்தடைந்தார்.
குறி தப்பியதால் குண்டு டிரம்ப் காதை உரசி சென்றது. இதனை உணர்ந்து டிரம்ப் உடனடியாக கீழே அமர்ந்து குனிந்து கொண்டார். பாதுகாப்பு அதிகாரிகளும் அவரை சுற்றி சூழ்ந்து பாதிப்பு ஏற்படாமல் காத்தனர்.
இதனிடையே, துப்பாக்கிச்சூடு நடத்தியவர் அடையாளம் காணப்பட்டு உள்ளார். தாமஸ் மேத்யூ க்ரூக்ஸ் என்ற இளைஞர் . 20 வயது மதிக்கத்தக்கவர். டிரம்ப் இருந்த மேடையில் இருந்து சற்று தொலைவில் கட்டடம் ஒன்றின் மேற்கூரையில் இருந்து சுட்டுள்ளார்.இந்த தாமஸ் மேத்யூ க்ரூக்ஸ் பென்சில்வேனியாவை சேர்ந்தவர்
தாக்குதல் நடந்த போது நிலை குலையாமல், ரத்தம் சொட்டும் நிலையிலும் ஆதரவாளர்களை நோக்கி கையை உயர்த்தி ‛தம்ப்’ சின்னத்தை காட்டி, உற்சாகமாக கோஷம் எழுப்பியவாறு மருத்துவமனைக்கு சென்றார். சுற்றி இருந்தவர்களும் ஆதரவு குரல் எழுப்பினர்.
இந்தச் சம்பவம் குறித்து தகவல் வெளியானதும் சமூக வலைதளங்களில் டிரம்ப் குறித்த ஹேஷ்டேக் வைரல் ஆனது. ஜப்பான் முன்னாள் பிரதமர் ஷின்ஜோ அபே உள்ளிட்ட உலக தலைவர்கள் மீது நடத்தப்பட்ட துப்பாக்கிச்சூடு சம்பவங்களை எடுத்துக்கூறி கருத்துகளை பதிவிட்டு வருகின்றனர். துப்பாக்கிச்சூடு நடத்திய நபரை விமர்சிக்கின்றனர். பிரசார கூட்டத்தில் இருந்தவர்கள் அளித்த பேட்டி, ரத்தக்காயத்துடன் இருக்கும் டிரம்ப் குறித்த புகைப்படங்களை பதிவிட்டு வருகின்றனர். இதனால், எக்ஸ் வலைதளத்தில் ‛ Trump, PresidentTrump, Shooter’ ஆகிய ஹேஷ்டேக்குகள் டிரெண்டிங்கில் இருந்தன.
அமெரிக்காவைப் பொறுத்தவரை அந்நாட்டின் அரசியலமைப்பே துப்பாக்கி வைத்திருக்கும் உரிமையை அந்நாட்டு மக்களுக்கு வழங்குகிறது. ஒரு சுதந்திர அரசின் பாதுகாப்பிற்குத் தேவையான ஆயுதங்களை வைத்திருக்கும் மக்களின் உரிமை மீறப்படாது என்று அந்தச் சட்டம் சொல்கிறது. இந்த சட்டம் இருப்பதாலேயே அமெரிக்காவில் பலரும் துப்பாக்கிகளை வாங்க முடிகிறது. அமெரிக்காவைப் பொறுத்தவரை அங்கு 18 வயதை நிரம்பியவர்களில் மூன்றில் ஒரு பகுதியினர் துப்பாக்கி வைத்துள்ளனர். அதேபோல கிட்டதட்ட 40% பேரின் வீடுகளில் துப்பாக்கி இருப்பதாக ஆய்வுகள் கூறுகிறது. குறிப்பாக அதிக ஆற்றல் கொண்ட துப்பாக்கிகள் மற்றும் செமி ஆடோமொடிக் துப்பாக்கிகள் அமெரிக்கா முழுவதும் எப்போதும் இல்லாத வகையில் மலிவாகவும் பரவலாகவும் கிடைப்பதே இதற்கு முக்கிய காரணமாகும்.