எந்தத் தடையும் இல்லை, எந்த கருத்து மோதலும் இல்லை ராபர்ட் முல்லரின் அறிக்கைக்கு: அதிபர் டிரம்ப்

அமெரிக்க அதிபர் தேர்தலில் ரஷ்யாவின் குறுக்கீடு தொடர்பான ராபர்ட் முல்லரின் அறிக்கை குறித்து அமெரிக்க அரசுத் தலைமை வழக்கறிஞர் அளித்துள்ள விளக்கம் அமெரிக்க அரசியல் வட்டாரத்தில் புயலைக் கிளப்பி வருகிறது. அமெரிக்க அதிபர் தேர்தலின் போது டோனால்ட் டிரம்ப்பின் பிரச்சாரக் குழுவைச் சேர்ந்த எந்த ஒரு நபரும் ரஷ்யாவின் சதித்திட்டத்தில் உடந்தையாக இருக்கவில்லை என்று ராபர்ட் முல்லர் தமது விசாரணை அறிக்கையில் குறிப்பிட்டுள்ளதாக அமெரிக்க அரசுத் தலைமை வழக்கறிஞர் வில்லியம் பர் அமெரிக்க காங்கிரஸ் சபையிடம் கடிதம் மூலம் தெரிவித்துள்ளார்.அமெரிக்க அதிபர் தேர்தலின் போது ஹிலாரி கிளிண்டனை தோல்வியுறச் செய்ய ரஷ்யா குறுக்கிட்டு வதந்திகளைப் பரப்பியதாக சர்ச்சை எழுந்தது. இதுதொடர்பான விசாரணை நடத்த ராபர்ட் முல்லர் தலைமையிலான குழு நியமனம் செய்யப்பட்டது. இக்குழு 22 மாதம் விசாரணை நடத்தி சில நாட்களுக்கு முன்பு தனது அறிக்கையை அமெரிக்க நாடாளுமன்றத்தின் நீதிக்குழு முன்பு தாக்கல் செய்தது. அந்த அறிக்கையின் விவரங்கள் ரகசியமாக வைக்கப்பட்டதாகவும் வெள்ளை மாளிகைக்கு அறிக்கையின் விவரம் ஏதும் தெரிவிக்கப்படவில்லை என்றும் டிரம்ப் அரசு அறிவித்தது. தற்போது அந்த அறிக்கையில் டிரம்ப் அல்லது அவருடைய கட்சியின் ஒரு நபர் மீது கூட ராபர்ட் முல்லரின் அறிக்கையில் குற்றம் சாட்டப்படவில்லை என்று அட்டர்னி ஜெனரல் வில்லியம் பர் தெரிவித்துள்ளார். இந்த அறிக்கையை இவ்வாறு அமைப்பதற்கு அதிபர் டிரம்ப்பின் அழுத்தம் ராபர்ட் முல்லரின் விசாரணைக் குழுவின் மீது இருந்ததா என்றும் சிலர் கேள்வி எழுப்பிக் கொண்டிருக்க அதிபர் டிரம்ப்போ தம்மீதான எந்த ஒரு விமர்சனத்திற்கும் ராபர்ட் முல்லரின் அறிக்கைக்கும் பதில் அளிக்கவில்லை. அவர் புளோரிடாவில் உள்ள சொகுசு கடற்கரையில் தமது விடுமுறையைக் கழித்து வந்தார். இன்று அதிகாலை அவர் தனிவிமானம் மூலம் வாஷிங்டன் திரும்பினார். அப்போது செய்தியாளர்களிடம் பேசிய டிரம்ப். ராபர்ட் முல்லரின் அறிக்கைக்கு எந்தத் தடையும் இல்லை, எந்த கருத்து மோதலும் இல்லை என்று கூறினார்.