பெத்ரா குவித்தோவா மகளிர் ஒற்றையர் பிரிவு கால் இறுதியில் விளையாட தகுதி பெற்றுள்ளார்….

அமெரிக்காவில் நடைபெறும் மயாமி ஓபன் டென்னிஸ் போட்டித் தொடரின் மகளிர் ஒற்றையர் பிரிவு கால் இறுதியில் விளையாட, செக் குடியரசு வீராங்கனை பெத்ரா குவித்தோவா தகுதி பெற்றார்.நான்காவது சுற்றில் பிரான்சின் கரோலின் கார்சியாவுடன் மோதிய குவித்தோவா 6-3, 6-3 என்ற நேர் செட்களில் வென்றார். இப்போட்டி 1 மணி, 24 நிமிடத்தில் முடிவுக்கு வந்தது. மற்றொரு 4வது சுற்றில் களமிறங்கிய ரோமானியாவின் சிமோனா ஹாலெப் 6-3இ 6-3 என்ற நேர் செட்களில் அமெரிக்க நட்சத்திரம் வீனஸ் வில்லியம்சை வீழ்த்தினார். டென்மார்க்கின் கரோலின் வோஸ்னியாக்கி தனது 4வது சுற்றில் 3-6, 7-6 (7-0), 2-6 என்ற செட் கணக்கில் சூ வெய் சையிடம் (சீன தைபே) தோற்று வெளியேறினார். செக் குடியரசின் கரோலினா பிளிஸ்கோவா 2-6, 6-3, 7-5 என்ற செட் கணக்கில் யுலியா புடின்ட்சேவாவை (கஜகஸ்தான்) வீழ்த்தி கால் இறுதிக்கு தகுதி பெற்றார். கனடாவின் பியான்கா ஆண்ட்ரீஸ்கு தனது 4வது சுற்றில் அனெட் கோன்டாவெய்ட்டுக்கு எதிராக 1-6, 0-2 என பின்தங்கிய நிலையில், காயம் காரணமாக விலகுவதாக அறிவித்தார்.இதனால் கோன்டாவெய்ட் (எஸ்டோனியா) கால் இறுதிக்கு முன்னேறினார். சீனாவின் கியாங் வாங், செக் குடியரசின் மார்கெடா வோண்ட்ரூசோவா ஆகியோரும் கால் இறுதிக்கு தகுதி பெற்றுள்ளனர். 4வது சுற்றில் பெடரர்: ஆண்கள் ஒற்றையர் பிரிவு 4வது சுற்றில் விளையாட சுவிஸ் நட்சத்திரம் ரோஜர் பெடரர் தகுதி பெற்றார். 3வது சுற்றில் செர்பியாவின் பிலிப் கிராஜினோவிச்சுடன் மோதிய பெடரர் 7-5, 6-3 என்ற நேர் செட்களில் வென்று கால் இறுதிக்கு முந்தைய சுற்றுக்கு முன்னேறினார். முன்னணி வீரர்கள் கெவின் ஆண்டர்சன் (தென் ஆப்ரிக்கா), ஜார்டன் தாம்சன் (ஆஸி.), டானில் மெட்வதேவ் (ரஷ்யா), ஸ்டெபனோஸ் சிட்சிபாஸ் (கிரீஸ்), டெனிஸ் ஷபோவலாவ் (கனடா), டேவிட் காபின் (பெல்ஜியம்), பிரான்சிஸ் டியபோ (அமெரிக்கா) ஆகியோரும் 4வது சுற்றுக்கு தகுதி பெற்றுள்ளனர்.